Ысык-Көлдөн 2 200 метр синтетикалык тор чыгарылды

Ысык-Көл облусунда 10-ноябрда суу биоресурстарын коргоо, браконьерликтин алдын алуу жана көлдүн экологиялык абалын жакшыртуу максатында рейддик иш-чара өткөрүлдү.

Иш-чараны Жаратылыш ресурстары, экология жана техникалык көзөмөл министрлигинин Ысык-Көл аймактык башкармалыгынын кызматкерлери жүргүзүшкөн.

Министрликтен билдиргендей, рейддин жүрүшүндө көлдөн узундугу 2 200 метр эски синтетикалык балык уулоочу торлор жана 30 килограмм таштанды чыгарылды.

Мекеме көлдө калган эски синтетикалык торлор суу жаныбарлары жана балыктар үчүн коркунуч жаратып, суу экосистемасына терс таасирин тийгизерин белгиледи.