Таласка 30 жаңы электробус алып келүү пландалууда
Жакынкы күндөрү Талас облусу үчүн 30 заманбап электробус сатып алуу пландалууда. Бул тууралуу президенттин Талас облусундагы ыйгарым укуктуу өкүлү Эрмат Жумаев социалдык тармактагы баракчасында билдирди.
Анын айтымында, долбоор Президент Садыр Жапаровдун колдоосу менен ишке ашырылып, Талас шаарынын жана аймактардагы тургундарды сапаттуу коомдук транспорт менен камсыздоого багытталган.
Маалыматка ылайык, “Yutong” компаниясынын электробустарын сатып алуу үчүн 180 миллион сом каражат бөлүнгөн. Коомдук транспорт лизинг жолу менен алынат.
Белгиленгендей, электробустар толук кубатталгандан кийин 200 чакырымга чейин тынымсыз жүрө алат. Делегация “Yutong” компаниясынын электробустарын тест-драйвдан өткөрүп, алардын техникалык мүмкүнчүлүктөрү, сапаты жана ыңгайлуулугу менен таанышкан.
“Электробустардын заманбап шарттары, кубаттуулугу жана ыңгайлуулугу бизге абдан жакты”, — деп жазган Эрмат Жумаев.
Ал ошондой эле тиешелүү келишим жакынкы күндөрү түзүлөрүн, ал эми эки айдын ичинде 30 электробус Талас облусуна жеткирилерин белгиледи.
Жаңы электробустар өлкөнүн эгемендүүлүгүнүн 35 жылдыгына карата элге салтанаттуу түрдө тапшырылары айтылды.
Долбоор Талас облусунда коомдук транспорт системасын өнүктүрүүгө жана тургундардын жашоо сапатын жакшыртууга багытталган.
