Бишкек–Нарын–Торугарт жолундагы Кубакынын бурулушуна жол чырак орнотулууда
Транспорт министри Талантбек Солтобаев берген тапшырманын негизинде Бишкек–Нарын–Торугарт унаа жолундагы Кубакынын бурулушуна жаңы жол чырак орнотуу иштери жүргүзүлүүдө. Учурда жол чырак тесттик режимде иштеп жатат.
Ведомствонун маалыматына ылайык, долбоор Жол кыймылынын коопсуздугун камсыздоо башкы башкармалыгы менен биргеликте ишке ашырылууда. Анын негизги максаты — жол кыймылынын коопсуздугун жогорулатуу жана мүмкүн болгон жол кырсыктарынын алдын алуу.
Кубакынын бурулушу өлкөдөгү маанилүү транспорттук түйүндөрдүн бири болуп саналат. Бишкек шаарынан бара жаткан багытта бул жерден жол эки тарапка бөлүнүп, бир багыты Ысык-Көл облусуна, экинчи багыты Нарын облусуна кетет. Унаа агымынын көптүгүн эске алуу менен жол чырактын орнотулушу кыймылды жөнгө салып, айдоочулар жана жүргүнчүлөр үчүн коопсуз шарттарды түзүүгө багытталган.
Белгилей кетсек, жаңы жол чырак 2026-жылдын 21-майынан тарта толук кандуу иштеп баштайт.
