Бишкекте электр чыгырыктарынын ылдамдыгын 15 км/саатка түшүрүү сунушталды
Бишкек шаарынын мэриясы жол кыймылынын коопсуздугуна байланыштуу токтом долбоорун коомдук талкууга чыгарды. Анда электросамокаттар жана башка жеке мобилдүүлүк каражаттары үчүн уруксат берилген эң жогорку ылдамдыкты саатына 25 чакырымдан 15 чакырымга чейин төмөндөтүү сунушталууда.
Мэриянын маалыматына ылайык, бул демилге жөө жүргүнчүлөрдүн жана жеке мобилдүүлүк каражаттарын колдонгондордун коопсуздугун жогорулатууга багытталган.
Белгиленгендей, акыркы учурда тротуарларда, сейил бактарда жана эл көп жүргөн аймактарда жөө жүргүнчүлөрдү сүзүп кетүү учурлары көбөйгөн. Мындан тышкары, саатына 25 чакырым ылдамдыкта башкарууну жоготуу жана кырсыктын кесепети оор болору айтылат.
Документте ошондой эле прокат кызматын көрсөткөн операторлор үчүн жоопкерчилик киргизүү сунушталган. Тактап айтканда, орнотулган ылдамдык чектегичтерин өчүрүү же айланып өтүү фактылары аныкталса, мыйзам бузгандар менен келишимди токтотуу чарасы каралат.
Мэрия белгилегендей, ылдамдыкты 15 км/саатка чейин чектөө дүйнөнүн көптөгөн шаарларында колдонулган эл аралык тажрыйбага туура келет.
Токтом долбоору коомдук талкуу үчүн koomtalkuu.gov.kg порталында жайгаштырылды.
