Ысык-Атадагы Госдорога – Объездная жолу бүткөрүлдү
Чүй облусунун Ысык-Ата районуна караштуу Госдорога - Объездная унаа жолунда асфальт төшөө иштери толугу менен аяктады. Бул тууралуу “Кыргызавтожол-Түндүк” ишканасынын басма сөз кызматы билдирди.
Маалыматка таянсак, 2026-жылдын титулдук тизмесине ылайык жүргүзүлгөн иштердин алкагында жалпы узундугу 1,5 чакырым болгон жол тилкесине жаңы асфальт-бетон катмары төшөлдү.
Жол куруу иштеринин жүрүшүндө эски жана жараксыз абалга келген жол катмары калыбына келтирилип, атайын техниканын жардамы менен сапаттуу асфальт төшөө иштери жүргүзүлдү. Жол талаптарга ылайык камсыздалып, унаа кыймылы үчүн коопсуз жана ыңгайлуу шарттар түзүлдү.
Аталган иштер №34 Жол тейлөө ишканасы филиалы тарабынан аткарылды. Жүргүзүлгөн оңдоо иштери аймактагы транспорттук байланышты жакшыртып, жол кыймылынын коопсуздугун камсыздоого жана айдоочулар үчүн ыңгайлуу шарттарды түзүүгө багытталган.
