Бишкек – “Манас” аэропорту жолунда заманбап транспорттук түйүн курулуп жатат
Бишкек — эл аралык “Манас” аэропорту унаа жолунун 11+800-чакырымында заманбап транспорттук түйүн жана жалпы узундугу 8,74 чакырымды түзгөн кире бериш жолдордун курулушу уланууда. Бул тууралуу Транспорт жана коммуникациялар министрлигинин маалымат кызматы билдирди.
Маалыматка ылайык, учурда 5 миң 800 метр аралыкта жолдун борбордук огун белгилөө иштери толугу менен аяктады. Мындан тышкары, объект боюнча жалпысынан 8 миң 290 метр аралыкта өсүмдүк катмарын жана кыртышты сыйрып тазалоо жумуштары жүргүзүлдү.
Курулуш иштеринин алкагында жолдун ар кайсы тилкелеринде үймөктөрдүн катмарларын төшөө иштери да активдүү жүрүп жатат.
Ошондой эле дренаж системасын жөнгө салуу максатында жолдун оң тарабында 190 метр аралыкта дренаждык катмар үчүн таш төшөө иштери аяктап, учурда котлован казуу жумуштары жүргүзүлүүдө.
Белгиленгендей, объектте жалпысынан 93 даана атайын техника жана 101 жумушчу тартылган. Жол куруу долбоору борбор калаага кирүүчү негизги жолдордун инфраструктурасын жакшыртып, транспорт кыймылын жеңилдетүүгө багытталган.
