Чолпон-Ата айланма жолу 4 тилкелүү болуп курулууда
Узуну 15,64 чакырымды түзгөн 4 тилкелүү Чолпон-Ата айланма унаа жолунун курулушу графикке ылайык жүрүүдө. Бул тууралуу Транспорт Транспорт жана коммуникациялар министрлигинин маалымат кызматы билдирди.
Маалыматка ылайык, курулушта 123 атайын техника жана жабдыктар үзгүлтүксүз иштеп жатат.
Учурда жол жээгин тазалоо жана бадалдарды жулуп тазалоо, жер жумуштары аткарылууда.
Курулуш алкагында 791 миң м³ казылган топурак үймөккө чыгарылып, карьерден алынган материалдар менен 76,4 миң м³ жер тосмосу курулду.
Өрнөк айылында асфальт-бетон заводу жана майдалоочу-сорттоочу орнотмо мобилизацияланып, битум кудугу даярдалды.
Долбоор боюнча 45 суу өткөрүүчү түтүк каралган. Ал эми ПК 35+51 дарегиндеги көпүрөдө тирөөчтөрдүн астын казуу иштери дээрлик аяктап калды.
