Ошто жаңы 3 тараптуу айланма жол курулуп бүттү

Ош шаарында жол инфраструктурасын өнүктүрүү багытындагы иштердин алкагында жаңы 3 тараптуу айланма жолдун курулушу аяктады. Бул тууралуу Ош шаарынын мэриясы билдирди.

Шаар мэри Жанарбек Акаев Г.Айтиев жана А.Навои көчөлөрүнүн кесилишинде курулган заманбап айланма жолдун абалы менен жеринен таанышты.

Долбоордун алкагында А.Навои көчөсү тарабынан 6 тилкелүү жол каралып, Г.Айтиев көчөсү Б.Осмонов көчөсү тарапка кеңейтилип, 6 тилкелүү форматка өткөрүлүүдө.

Мындан тышкары, жаңы альтернативалык багыт катары Көчкөнов көчөсү ачылып, ал аркылуу жаңы базарга түз кирүү мүмкүнчүлүгү түзүлөт.

Муниципалитеттин маалыматына ылайык, айланма жолдун жалпы диаметри 25 метрди түзөт. Шаар башчысы курулуш иштерин сапаттуу жүргүзүп, белгиленген мөөнөттө бүтүрүү боюнча тиешелүү кызматтарга тапшырма берди.

Белгилей кетсек, учурда Ош шаарында жол инфраструктурасын жакшыртуу жана жол кырсыктарынын алдын алуу боюнча иштер ырааттуу жүргүзүлүүдө.