Токтогул – Беш-Таш автожолунда капиталдык оңдоо иштери уланууда
Токтогул – Беш-Таш автожолунун 0+000 чакырымдан 53+000 чакырымга чейинки бөлүгүндө капиталдык оңдоо иштери активдүү жүрүп жатат. Бул тууралуу Транспорт жана коммуникациялар министрлигинен билдиришти.
Аталган жол III–IV категорияга кирип, жолдун жалпы туурасы 8–10 метрди, ал эми асфальт төшөлмөсүнүн туурасы 7 метрди түзөт.
Бүгүнкү күндө жолдун 15 чакырымдан ашуун тилкесинде негизги курулуш иштери кызуу фазада жүргүзүлүүдө. Учурда эски асфальт катмарын сыйруу иштери улантылып, дренаждык система жана суу өткөрүүчү түтүктөрдү орнотуу боюнча иштер негизинен аяктады.
Ошондой эле Ак-Тектир айланып өтүүчү жолунда жана айыл ичиндеги ар түрдүү көлөмдөгү түтүктөр толугу менен орнотулду.
Курулуш иштеринин сапаттуу жана үзгүлтүксүз жүрүшүн камсыз кылуу максатында объектте 40 даана атайын техника жана 112 адис иш алып барууда.
Белгилей кетсек, Президент Садыр Жапаровдун колдоосу менен Президенттин стабилдештирүү фондунан бул жолдун курулушуна атайын каражат бөлүнгөн. Учурда долбоор Транспорт жана коммуникациялар министри Талантбек Солтобаевдин жеке көзөмөлүндө ишке ашырылууда.
