Бишкекте оор жүк ташуучу унааларга убактылуу чектөө киргизилди
Бишкек шаарында жай мезгилинде жолдордун сакталышын камсыздоо жана жол коопсуздугун жогорулатуу максатында оор жүк ташуучу унаалардын кыймылына убактылуу чектөө киргизилди.
Бишкек мэриясынын маалыматына ылайык, 2026-жылдын 20-майынан 1-октябрына чейин күндүз абанын температурасы 28 градустан жогору болгон учурда саат 09:00дөн 19:00гө чейин максималдуу салмагы 18 тоннадан ашкан жүк ташуучу унаалардын шаар аймагындагы муниципалдык жолдордо жүрүүсүнө чектөө коюлат.
Чектөө Бишкектеги муниципалдык жолдорго тиешелүү экени белгиленди.
Ошол эле учурда гуманитардык жардам, азык-түлүк, күйүүчү-майлоочу материалдарды ташыган унааларга, ошондой эле атайын уруксат менен жүргөн ири габариттүү жүктөргө жана жол куруу иштерине тартылган техникаларга бул чектөө колдонулбайт.
Мэриянын маалыматына ылайык, райондук администрацияларга жана тиешелүү кызматтарга айдоочулар жана жүк ташуучу компаниялар арасында түшүндүрүү иштерин жүргүзүү тапшырылды.
Бишкек мэриясы айдоочуларды убактылуу чектөөлөргө түшүнүү менен мамиле кылууга жана белгиленген эрежелерди сактоого чакырды.
