Бишкектеги Элебесов көчөсү 4 тилкелүү болуп кеңейтилет
“Дордой” базарынын аймагындагы жол инфраструктурасын оңдоп-түзөө долбоорунун экинчи этабынын алкагында Бишкек шаарынын мэри Айбек Жунушалиев жакынкы күндөрү жасала турган Элебесов көчөсүндө болду.
Бишкек шаардык мэриясынын басма сөз кызматынын маалыматына караганда, долбоорго ылайык, узундугу 1,5 чакырымды түзгөн тилке оңдолуп, жолдун жүрүүчү бөлүгү төрт тилкеге чейин кеңейтилет. Жолдун туурасы 20 метрди түзөт. Ошондой эле эки жагына тротуар курулуп, ирригациялык тармак орнотулат.
Ушул эле долбоордун алкагында узундугу 800 метр, туурасы 20 метр болгон Безымянная көчөнү Түндүк айланма жолго чейин оңдоо да пландалууда.
Айбек Жунушалиев курулуш иштеринин сапаттуу аткарылышын жана белгиленген мөөнөттөрдүн так сакталышын камсыз кылууну тапшырып, бардык иштер жаңы окуу жылы башталганга чейин аяктоого тийиш экендигин баса белгиледи. Бул шаар тургундарына, окуучуларга жана жол кыймылынын катышуучуларына ыңгайсыздык жаратпоого мүмкүндүк берет.
Мындан тышкары, тиешелүү шаардык кызматтарга көчөнү кеңейтүү жана оңдоп-түзөө иштерине байланыштуу объектилердин ээлери менен зарыл иштерди жүргүзүү, анын ичинде аларга өз убагында тиешелүү эскертмелерди тапшыруу милдети жүктөлдү.
