Ош – Кара-Суу жолу оңдоп-түзөөдөн өтүүдө
Ош – Кара-Суу унаа жолун оңдоп-түзөөнүн алкагында узундугу 18,690 чакырым жол асфальтталууда. Жолдун туурасы 15 метрден 22 метрге чейин жетип, 4 тилкелүү болот. Жөө жүргүнчүлөрдүн коопсуздугу үчүн туурасы 3 метр болгон жөө адамдар өтүүчү жана велосипеддер үчүн жол курулууда.
Транспорт жана коммуникациялар министрлигинин маалыматына караганда, аталган автомобиль жолу эки тарабынан толук жарыктандырылат. Жол кыймылынын коопсуздугун камсыздоо максатында жолдун 7 чакырымдык бөлүгүнүн ортосуна туурасы 4 метр болгон бетондук барьер орнотулат. Ошондой эле унаа кыймылы жогору болгон жолдун баштапкы 0–2,0 чакырым бөлүгү 6 тилкелүү болуп курулат.
Учурда курулуш иштеринин 30%ы аяктады. Жол курууга жалпысынан 122 жумушчу тартылып, 117 даана атайын техника иштеп жатат. Бул жол Президент Садыр Жапаровдун тапшырмасы менен калктын жашоо шартын жакшыртуу жана аймактардагы инфраструктураны өнүктүрүү максатында президенттин фондунан каржыланууда.
Долбоорду ишке ашыруу жана анын сапатын камсыздоо боюнча иштер Транспорт жана коммуникациялар министрлиги тарабынан тыкыр көзөмөлгө алынып, белгиленген талаптарга ылайык жүргүзүлүүдө.
