Түндүк – Түштүк жолуна жол тейлөө пункттары курулууда
Президент Садыр Жапаровдун тапшырмасына ылайык, Түндүк –Түштүк жолундагы трассанын үч тилкесинде заманбап жол тейлөө базалары курулууда. Учурда Кызарт белиндеги жол тейлөө базасынын дубалдары тургузулуп, объект таза суу жана интернет байланышы менен камсыздалды. Бул жерде кызматкерлердин үзгүлтүксүз иш алып баруусу үчүн зарыл болгон шарттар түзүлүүдө.
Транспорт жана коммуникациялар министрлигинин маалымат кызматынын айтымына караганда, Сузак районунун Калмак-Кырчын айылынын жанында дагы бир жол тейлөө базасынын курулушу башталды. Азыркы учурда анын пайдубалы түптөлүп, курулуш иштери белгиленген графикке ылайык жүргүзүлүүдө.
Аталган базаларга атайын жол куруу жана жол тейлөө техникалары, заманбап жабдуулар, күйүүчү-майлоочу материалдар жана башка керектүү ресурстар жайгаштырылат. Мунун натыйжасында трассаны төрт мезгил бою үзгүлтүксүз жана сапаттуу тейлөө мүмкүнчүлүгү кеңейет.
Мындан тышкары, үчүнчү жол тейлөө базасын жайгаштыруу боюнча да даярдык иштери жүргүзүлүүдө. Учурда ылайыктуу жер тилкесин аныктоо жана тиешелүү долбоордук-техникалык документтерди даярдоо иштери жүрүп жатат.
Жол тейлөө базалары пайдаланууга берилгенден кийин трассаны жыл бою сапаттуу тейлөө камсыздалып, жол кыймылынын коопсуздугу жана айдоочулар үчүн ыңгайлуулук жогорулайт.
