“Манас” аба майданында каттамдар жандана баштады
7-июлда TezJet авиакомпаниясынын Бишкек – Ош багытындагы учагы шассидеги техникалык мүчүлүштүктөн улам учууну токтоткон окуядан кийин “Манас” эл аралык аба майданынын каттамдарынын графиги өзгөрдү.
“Кыргызстан аэропорттору” ишканасынын маалыматына ылайык, окуядан кийин айрым каттамдар башка аба майдандарына багытталып, кээ бирлери жокко чыгарылып же кечигүү менен аткарылууда.
Маалыматка караганда, бүгүн авиакомпаниялардын көбү каттамдарын түштөн кийинки жана кечки убакытка жылдырды. Бул чечим учакты учуу-конуу тилкесинен чыгарып, тилкени толук бошотуу зарылдыгына байланыштуу кабыл алынган.
Учак тилкеден чыгарылгандан кийин биринчи каттамды саат 11:50дө учуруу пландалган.
Учурда жаңы учуу графиги түзүлүп жатат. Маалыматка ылайык, түнкү саат 24:00гө чейин кечигип калган бардык каттамдарды аткаруу мерчемделүүдө.
