Бишкекте Васильевский тракт көчөсүн оңдоп-түзөө улантылууда
Бишкекте шаардын жол-транспорттук инфраструктурасын жаңылоо боюнча иш-чаралардын алкагында Васильевский тракт көчөсүн этап-этабы менен оңдоо уланууда.
Бишкек шаардык мэриясынын маалыматына ылайык, оңдоп-түзөө иштеринин биринчи этабы 23-26-июнда ийгиликтүү аяктады. Иштердин жүрүшүндө жалпы узундугу 8 километрди түзгөн жол тилкеси оңдолгон.
Экинчи этап 27-июндан 4-июлга чейин уланып, Фучик көчөсүнөн “Манас”эл аралык аэропортуна чейинки тилкени камтыган.
Үчүнчү этап 5-12-июлда ишке ашырылган. Комсомол көчөсүнөн Чоң Чүй Каналына чейинки 7 километрлик тилкеде иштер жүргүзүлгөн.
13-июлдан баштап оңдоп-түзөөнүн төртүнчү этабы башталат. Бул этаптын алкагында аэропорттон Манас айылына чейинки тилкеде жолдун чыгыш тарабы жабылат. Унаалардын кыймылы жолдун карама-каршы тарабы менен уюштурулат.
Жол кыймылынын катышуучуларына ыңгайсыздыктарды азайтуу максатында, жолду толук жабуу каралган эмес. Оңдоо иштери жүрүп жаткан мезгилде эки багыттагы унаа кыймылы жолдун бир тарабы аркылуу жүргүзүлөт.
Бишкек шаарынын мэриясы шаар тургундарынан жана конокторунан убактылуу киргизилген чектөөлөргө түшүнүү менен мамиле кылууга, жол белгилеринин талаптарын жана жол кыймылын жөнгө салуучулардын көрсөтмөлөрүн так аткарууга, ошондой эле мүмкүн болушунча жүрүү багытын алдын ала пландаштырууга чакырат.
