Балыкчы – Бөкөнбаев – Каракол жолу текшерилди
Транспорт жана коммуникациялар министринин биринчи орун басары Тариэль Жаныбеков Ысык-Көл облусуна болгон иш сапарынын алкагында аймактагы негизги жол куруу долбоорлорунун жүрүшүн жеринен текшерди. Бул тууралуу Транспорт жана коммуникациялар министрлигинин маалымат кызматынан билдиришти.
Маалыматка ылайык, Т.Жаныбеков Чолпон-Ата шаарындагы айланма жолдун, “Алтын-Булак”, “Чайка” жана “Азербайжан” пансионаттарына алып баруучу жолдордун, ошондой эле Балыкчы – Бөкөнбаев – Каракол унаа жолундагы оңдоо иштеринин жүрүшү менен таанышты.
Ошондой эле биринчи орун басар Чолпон-Ата шаарындагы капиталдык оңдоодон өтүп жаткан ат майданынын курулуш иштерин көрүп чыкты.
Текшерүүнүн жыйынтыгында курулуш иштеринин сапатын камсыздоо, аткаруу темпин күчөтүү жана белгиленген мөөнөттөрдү так сактоо боюнча тиешелүү жетекчилерге тапшырмалар берилди.
Учурда “Чайка” жана “Алтын-Булак” пансионаттарына алып баруучу жолдордо асфальт төшөө иштери толук аяктап, жыйынтыктоочу жумуштар жүргүзүлүүдө. Ал эми “Азербайжан” пансионатына алып баруучу жол жакынкы күндөрү асфальт төшөө иштери башталат.
Министрлик өлкө боюнча жол курулуп жаткан жолдордун сапатын жана белгиленген мөөнөттө аткарылышын туруктуу көзөмөлдөөнү улантууда.
