Чолпон-Атадагы айланма жолдун курулушу текшерилди
Президент Садыр Жапаровдун колдоосу жана бөлүнгөн мамлекеттик каражаттын негизинде Чолпон-Ата шаарындагы айланма жолдун жана капиталдык оңдоодон өтүп жаткан ат майданынын курулуш иштери кызуу уланууда. Бул тууралуу Транспорт жана коммуникациялар министрлигинин маалымат кызматынан билдирди.
Маалыматка ылайык, Транспорт жана коммуникациялар министри Талантбек Солтобаев Ысык-Көл облусуна болгон иш сапарынын алкагында Чолпон-Ата шаарындагы айланма жолдун жана капиталдык оңдоодон өтүп жаткан ат майданынын курулуш иштеринин жүрүшү менен жеринен таанышты.
Учурда эки объектте тең курулуш иштери күчөтүлгөн тартипте, күнү-түнү жүргүзүлүүдө. Ат майданында асфальт төшөө иштери соңку баскычка жетип, бүтүрүү алдында турат.
Министр курулуш аянттарын кыдыруу учурунда аткарылып жаткан иштердин сапатына өзгөчө көңүл буруп, жооптуу жетекчилерге курулуштун темпин мындан ары да күчөтүү, белгиленген мөөнөттөрдү так сактоо жана бардык иштерди жогорку сапатта бүткөрүү боюнча тиешелүү тапшырмаларды берди.
Белгилей кетсек, Чолпон-Ата шаарындагы айланма жол менен ат майданын оңдоп-түзөө долбоорлору туристтик сезондун алдында транспорттук инфраструктураны жакшыртууга жана шаар тургундары менен келген коноктор үчүн ыңгайлуу шарттарды түзүүгө багытталган.
Транспорт жана коммуникациялар министрлиги өлкө боюнча ишке ашырылып жаткан жол куруу долбоорлорунун сапатына жана белгиленген мөөнөттө бүткөрүлүшүнө туруктуу көзөмөл жүргүзүүнү улантат.
