“Formula 1 H2O” мелдешине байланыштуу Ысык-Көлдө жол кыймылына чектөө киргизилет
30-июлдан 2-августка чейин Ысык-Көл районунун Бает айылында “Formula 1 H2O” Кыргызстандын Гран-приси – Issyk-Kul 2026 эл аралык мелдеши өткөрүлөт.
Жол кыймылынын коопсуздугун камсыздоо башкы башкармалыгынын маалыматына ылайык, аталган эл аралык иш-чаранын коопсуз өтүшүн камсыздоо максатында бул күндөрү Балыкчы – Ананьево – Каракол унаа жолунда айрым убактарда убактылуу жолдор жабылып, транспорт каражаттарынын кыймылына чектөөлөр киргизилет.
“Эгерде шашылыш зарылчылык болбосо, көрсөтүлгөн күндөрү аталган багыт боюнча алыскы сапарларды алдын ала пландап же кийинки мөөнөткө жылдырууну өтүнөбүз. Ошондой эле бул мезгилде айыл чарба техникаларынын, жүк ташуучу жана башка ири габариттүү автоунаалардын кыймылында убактылуу кыйынчылыктар жаралышы мүмкүн”, - деп айтылат маалыматта.
Алыскы сапарга чыккан айдоочуларга альтернативдүү каттам катары Жети-Өгүз жана Тоң райондору аркылуу өткөн Балыкчы – Бөкөнбаев – Каракол автоунаа жолун пайдалануу сунушталды.
