Балыкчы - Бишкек каттамындагы поезддин терезелери сындырылды
27-июлда саат 22:54 чамасында Балыкчы – Бишкек-2 багыты боюнча каттаган №609 шаар четиндеги жүргүнчү поезди Новопокровка айылынан чыгып бара жаткан учурда, белгисиз адамдар жүрүп бараткан поездди эки тарабынан атайылап таш менен ургулашкан. Бул тууралуу “Кыргыз темир жолу” ишканасынан билдиришти.
Маалыматка ылайык, мындай аракеттер жүргүнчүлөрдүн жана поезд бригадасынын кызматкерлеринин өмүрүнө жана ден соолугуна, ошондой эле поезддердин кыймылынын коопсуздугуна олуттуу коркунуч жараткан. Таштардын бири вагондун терезесинин айнегин сындырып, вагондун ичине кирген.
Окуянын кесепетинен бир нече вагондун терезелери сынып, “Кыргыз темир жолу” Улуттук компаниясы мамлекеттик ишканасына материалдык зыян келтирилди. Темир жол кызматкерлеринин ыкчам аракеттеринин натыйжасында жабыркаган терезелер кыска мөөнөттө алмаштырылды.
Бул факт боюнча материалдар укук коргоо органдарына өткөрүлүп берилди. “Кыргыз темир жолу” ишканасы күнөөлүүлөрдү ыкчам аныктап, мыйзамга ылайык жоопкерчиликке тартылат деп ишенет.
Ишкана жарандарды темир жол инфраструктурасынын объектилерине аяр мамиле кылууга жана вандализм фактылары же башка мыйзамсыз аракеттер тууралуу укук коргоо органдарына билдирүүгө чакырат.
