Бишкектеги А. Масалиев проспектисинде тышкы жарыктандыруу тармагы жаңыланды
Бишкек шаарындагы А. Масалиев проспектисинин 4 чакырымдан ашкан тилкесинде тышкы жарыктандыруу тармагы толугу менен жаңыланып, 180 жаңы мамы жана 360 энергияны үнөмдөөчү чырак орнотулду.
Бишкек шаарында тышкы жарыктандыруу тармагын жаңылоо жана тургундардын коопсуздугун жогорулатуу боюнча иштер уланууда.
Мэриянын маалыматына ылайык, шаардык инфраструктураны модернизациялоонун алкагында А. Масалиев проспектисинин Чортеков көчөсүнөн Байтик Баатыр көчөсүнө чейинки жалпы узундугу 4 чакырымдан ашкан тилкесинде тышкы жарыктандыруу тармагы толугу менен жаңыланды.
Долбоордун алкагында 180 жаңы жарык берүүчү мамы орнотулуп, 360 заманбап энергияны үнөмдөөчү LED чырак коюлду.
Белгиленгендей, жаңыланган жарыктандыруу жол кыймылынын коопсуздугун жогорулатууга, жөө жүргүнчүлөр үчүн түнкү убакта көрүнүүнү жакшыртууга жана борбор калаанын тургундары менен коноктору үчүн ыңгайлуу шарттарды түзүүгө багытталган.
