Бишкекте унаа айдоого чектөө киргизүү сунушталууда
Бишкек шаардык мэриясы борбор калаанын жол тыгыны эң көп болгон аймактарында коомдук транспортту өнүктүрүүгө артыкчылык берүүнү жана жеке унааларды колдонуунун мындан ары көбөйүшүн чектөөнү сунуштайт.
"Бишкек шаарынын жол-транспорттук системасын жакшыртуу боюнча чаралар жөнүндө" президенттин жарлыгынын долбоору коомдук талкууга коюлду.
Документте борбор калаанын жол-транспорттук системасын өнүктүрүү жана жол тыгындарын азайтуу боюнча иш-аракеттерди координациялоо максатында мекемелер аралык жумушчу топту түзүү сунушталууда. Бул жумушчу топту Бишкек шаарынын мэри жетектөөсү каралган.
Штаб 2026–2030-жылдарга карата жол тармагын өнүктүрүүнү, акылдуу транспорттук системаларды ишке киргизүүнү, жол кыймылын башкарууну оптималдаштырууну, коомдук транспортту өнүктүрүүнү, инфраструктуралык объекттерди курууну жана транспорт агымдарын жөнгө салууну камтыган комплекстүү иш-чаралар планын иштеп чыгышы керек.
Түшүндүрмө катта айтылгандай, транспорт каражаттарынын санынын өсүшү, Чүй облусунан каттагандардын көбөйүшү жана шаар аймагынын кеңейишине байланыштуу Бишкектеги жол кыймылынын абалы татаалдашты.
Шаардык мэриянын маалыматы боюнча, борбор калаада 400 миңден ашык унаа катталган, бирок транспорт системасы башында болжол менен 50 миң унаага ылайыкталып долбоорлонгон. Ошол эле учурда, жолдорду кеңейтүү мүмкүнчүлүгү шаардын тыгыз курулушу, жер тилкелерин алуунун жогорку баасы жана инженердик коммуникацияларды башка жерге көчүрүү зарылчылыгы менен чектелүүдө.Бул долбоорго байланыштуу, борбор калаанын жол кыймылы эң тыгын болгон аймактарында коомдук транспортту өнүктүрүүгө артыкчылык берүү жана жеке унааларды колдонуунун мындан ары өсүшүн чектөө сунушталууда.
