Киев көчөсүнүн эки тилкесинде жол кыймылы жарым-жартылай чектелет
"Бишкекжылуулуктармагы" муниципалдык ишканасы Киев жана Тыныстанов көчөлөрүнүн кесилишиндеги оңдоо иштери аяктаганын билдирди.
Маалыматка ылайык, кийинки этаптын алкагында 30-июлдан тарта Киев көчөсүнүн Абдрахманов менен Шопоков көчөлөрүнүн ортосундагы, ошондой эле Шопоков менен Ибраимов көчөлөрүнүн ортосундагы тилкелеринде жылуулук тармактарын алмаштыруу иштери жүргүзүлөт.
Анын алкагында Абдрахманов менен Шопоков көчөлөрүнүн ортосунда диаметри 159 мм болгон түтүктөр, ал эми Шопоков менен Ибраимов көчөлөрүнүн ортосунда диаметри 219 мм болгон түтүктөр жаңыланат.
Оңдоо иштерине байланыштуу 30-июлдан тартып аталган тилкелерде транспорттун кыймылы жарым-жартылай чектелет.
Муниципалдык ишкана шаар тургундарын жана конокторун каттамдарын алдын ала пландаштырып, убактылуу жол чектөөлөрүн эске алууга чакырды.
