"Элдик Банк" менен МИК 65 млн $ ипотекалык долбоорду баштады
«Элдик Банк» ААК менен «Мамлекеттик ипотекалык компания» ААК Азия өнүктүрүү банкынын колдоосу менен ишке ашырылып жаткан «Жеткиликтүү жана энергияны үнөмдөөчү турак жайга жеткиликтүүлүктү кеңейтүү» долбоорунун алкагында кайра каржылоо боюнча башкы келишимге кол коюшту.
Долбоордун жалпы каржылоо көлөмү 65 млн $ түзөт. Анын алкагында жарандар үчүн жеңилдетилген шарттагы жаңы ипотекалык программалар ишке киргизилет.
Документке «Элдик Банк» ААКнун Башкармасынын Төрагасы Уланбек Ногаев жана «Мамлекеттик ипотекалык компания» ААКнун Башкармасынын Төрагасы Талант Жекшенов кол коюшту.
Ага ылайык, биринчи этапта "Аялдардын ипотекасы" социалдык программасы ишке ашырылат. Программа аялдардын ипотекалык насыяга жеткиликтүүлүгүн кеңейтүүгө багытталган.
Программанын алкагында карыз алуучулар жеңилдетилген насыялоо шарттарына ээ болушат:
- Бишкек жана Ош шаарларында турак жай сатып алууга – жылдык 10,75%;
- Аймактарда турак жай сатып алууга – жылдык 9,75%.
Долбоордун кийинки этабында “Жашыл ипотека” программасы ишке киргизилип, энергияны үнөмдөөчү турак жайларды сатып алууга жана экологиялык таза курулуш технологияларын колдонууга колдоо көрсөтүлөт. Программаны ишке ашыруу курулуш тармагын туруктуу өнүктүрүү жана калктын жашоо сапатын жакшыртуу багытындагы дагы бир кадам болууда.
Тараптар бул долбоор Кыргызстанда жеткиликтүү ипотеканы кеңейтүүгө, аялдарды колдоого жана энергияны үнөмдөөчү турак жай курулушун өнүктүрүүгө өбөлгө түзөрүн белгилешүүдө.
“Аялдар жана жашыл ипотека программасы - жарандардын өз турак жайына жетүүсүн кыйла жеткиликтүү кылууга багытталган маанилүү кадам болуп саналат. Биз өзгөчө аймактардагы аялдарды колдоого басым жасап, аларга эртеңки күнгө ишеним арттырууга жана үй-бүлөлөрүнүн жашоо сапатын жакшыртууга көмөктөшөбүз”- деп билдирди “Мамлекеттик ипотекалык компания” ААКнын Башкармасынын Төрагасы Талант Жекшенов.
