Улуттук банк акча которуу системаларынын иштөө тартибине өзгөртүү киргизди
Улуттук банк акча которуу системалары аркылуу жүргүзүлүүчү которууларга байланыштуу эрежелерге өзгөртүүлөрдү киргизди. Тиешелүү токтом 2026-жылдын 15-июлунда кабыл алынган.
Жаңы талаптарга ылайык, акча которуу системаларынын операторлору жаңы кызматтарды же сервистерди ишке киргизерден кеминде 15 жумуш күнү мурда Улуттук банкка алдын ала маалымдап, бардык өзгөртүүлөр тууралуу толук маалымат берүүгө милдеттүү.
Ошондой эле Улуттук банк төмөнкү учурларда операторду реестрден чыгарууга укуктуу болот:
- оператордун лицензиясы же уруксат берүүчү документтери жокко чыгарылса;
- оператор өз ыктыяры менен ишин токтотууну чечсе;
- каттоодон өткөндөн кийин 12 ай ичинде ишин баштабаса же бир жылдан ашык иш жүргүзбөсө;
- Улуттук банктын талаптарын 12 ай ичинде эки же андан көп жолу бузса;
- каттоодо жалган маалымат бергендиги аныкталса.
Мындан тышкары, операторлор системанын эрежелерине өзгөртүү киргизүү жөнүндө да Улуттук банкка 15 жумуш күнү мурда жазуу жүзүндө билдирүүгө тийиш.
Жаңы тартипке ылайык, акча которуу системаларынын операторлору жүргүзүлгөн операциялар жана системанын катышуучулары тууралуу маалыматты ар бир чейректен кийин кийинки айдын 15инен кечиктирбей электрондук түрдө Улуттук банкка тапшырып турушат.
Токтом расмий жарыяланган күндөн тартып 15 күндөн кийин күчүнө кирет.
