Ысык-Көлдө мыйзамсыз валюта алмаштырган эки жаранга айып пул салынды
Кыргыз Республикасынын Улуттук банкы лицензиясы жок нак чет өлкө валютасын алмаштыруу операцияларын жүргүзгөндүгү үчүн эки жаранга айып пул салды.
Улуттук банктын Ысык-Көл облустук башкармалыгынан билдиргендей, Кыргызстандын жарандары К.Э.Т. жана Н.Н.Р. мыйзамсыз валюта алмаштыруу ишин жүргүзгөндүгү аныкталган. Анын негизинде ар бирине 17 миң 500 сом өлчөмүндө айып пул салынды.
Улуттук банктын маалыматы боюнча, 2026-жылдын 24-июлуна карата өлкөдө лицензиянын негизинде иш алып барган 897 алмашуу бюросу бар. Чет өлкө валютасын сатып алуу жана сатуу боюнча операцияларды жүргүзүүгө ушул расмий лицензияланган алмашуу бюролору гана укуктуу.
