Кыргызстанда Apple Pay эл аралык төлөм сервиси ишке киргизилди
Кыргызстандын банктык төлөм карталарынын ээлерине Apple түзүлүштөрү аркылуу товарлар жана кызмат көрсөтүүлөр үчүн коопсуз, тез жана ыңгайлуу төлөм жүргүзүүгө, ошондой эле мобилдик тиркемелерде жана интернет тармагында сатып алууларды ишке ашырууга мүмкүндүк берген Apple Pay эл аралык төлөм сервиси жеткиликтүү болуп калды. Бул тууралуу Улуттук банктан кабарлашты.
Маалыматка ылайык, Apple Pay сервисинин ишке кириши өлкөнүн төлөм инфраструктурасын өнүктүрүү жана Кыргызстанды дүйнөлүк санарип төлөм экосистемасына интеграциялоо боюнча жүргүзүлгөн иштердин жыйынтыгы болуп саналат.
Төлөмдөрдүн коопсуздугу токендештирүү технологиясы аркылуу камсыздалат. Анда банктык картанын маалыматтары уникалдуу санарип идентификатору менен алмаштырылып, операциялар Face ID же Touch ID аркылуу тастыкталат. Бул ыкма төлөм маалыматтарын коргоп, алдамчылык тобокелдиктерин азайтат.
Улуттук банк белгилегендей, жаңы сервистин ишке кириши жарандар үчүн төлөмдөрдү тез, коопсуз жана ыңгайлуу жүргүзүүгө шарт түзсө, бизнес үчүн накталай эмес эсептешүүлөрдү жана электрондук коммерцияны өнүктүрүүгө, ошондой эле чет өлкөлүк туристтерди тейлөө мүмкүнчүлүгүн кеңейтүүгө өбөлгө болот. Бул кардарларды тейлөөнүн сапатын жогорулатып, алдыңкы эл аралык төлөм технологияларын колдонууга киргизүү процессин тездетет.
Маалымат үчүн: Apple Pay – бул Apple компаниясы тарабынан сунушталган төлөм сервиси. Ал банктык төлөм картаны колдонбостон эле, Apple түзүлүштөрү аркылуу товарлар жана кызмат көрсөтүүлөр үчүн байланышсыз төлөмдөрдү ишке ашырууга мүмкүнчүлүк берет.
Аталган сервис токендештирүү технологиясын колдонот, анын алкагында банктык төлөм картасынын реквизиттери уникалдуу санарип идентификаторуна (токенге) алмаштырылат. Операциялар түзүлүштө орнотулган аутентификация каражаттары, анын ичинде Face ID жана Touch ID аркылуу тастыкталат.
