Улуттук банктын эсептик чени 12%дык деңгээлде калтырылды
Улуттук банк Башкармасынын 27-июлундагы отурумунда эсептик ченди 12%дык деңгээлинде калтыруу чечими кабыл алынган. Бул тууралуу Улуттук банктын төрагасынын орун басары Азат Козубеков маалымат жыйынынын жүрүшүндө билдирди.
Маалыматка ылайык, Глобалдык экономикада түзүлгөн тенденциялар Жакынкы Чыгышта абалдын курчушу алкагында КРдагы инфляциялык процесстерге таасир этишин улантууда. Дүйнөлүк азык-түлүк рынокторунда баанын өзгөрүлмөлүүлүгү, Ормуз кысыгы аркылуу мунай продуктуларын берүүнүн үзгүлтүккө учуроо тобокелдиктери жана ага байланыштуу дүйнөлүк мунай рыногундагы баа жагдайы өлкөгө импорттолуучу товарлардын наркынын өсүшүнүн негизги факторлорунун бири бойдон калууда.
“2026-жылдын башынан тартып Кыргыз Республикасында инфляция көрсөткүчү жалпысынан 6,5%ды түздү. Түзүлгөн инфляциянын түзүмүндө тышкы таасирдин алкагында азык-түлүк компоненти жана күйүүчү-майлоочу материалдар баалардын кыйла жогорулашын көрсөттү, бул өз кезегинде экинчи деңгээлдеги кесепеттерди жаратып, калктын керектөө куржунундагы товарлар менен кызмат көрсөтүүлөрдүн башка түрлөрүнүн баасына таасирин тийгизди”, – деп билдирди Козубеков.
Анын айтымында, КРнын экономикасында калктын реалдуу кирешелеринин тынымсыз көбөйүшүнүн натыйжасында ички суроо-талаптын өсүшү белгиленүүдө. Айрыкча, курулуш секторунда жогорку инвестициялык активдүүлүк байкалууда. Экономиканын бардык секторлору өлкөнүн реалдуу ИДӨсүнүн эки орундуу көрсөткүчтөрүн 11,9%дык деңгээлинде шарттоо менен оң динамиканы көрсөтүүдө.
Мындан сырткары, 2026-жылдын май айынан тартып жүргүзүлүп жаткан монетардык саясаттын алкагында тактикалык кадамдар өзгөртүлүп, экономикадагы акчанын көлөмүн жөнгө салуу чаралары күчөтүлгөндүгү маалымдалды.
Улуттук банк Башкармасынын эсептик чени боюнча кийинки отуруму 2026-жылдын 24-августунда өтөт.
