Бир коммерциялык банкка 13,6 млн сом айып пул салынды
Кыргызстанда Улуттук банктын лицензиясынын негизинде ишмердүүлүк жасап жаткан 26 коммерциялык банк жана алардын филиалдары бар. Алардын бири мыйзам талаптарын бузгандыгы үчүн Улуттук банк тарабынан - 13 млн 600 миң сом өлчөмүндө айып пул салынды.
Бул тууралуу Кыргыз Республикасынын Улуттук банкынан билдиришти. Маалыматка ылайык, 2026-жылдын 30-июлунда бир коммерциялык банкка ички контролдоо системасын уюштуруу боюнча Кыргыз Республикасынын мыйзамдарынын талаптарын бузгандыгы үчүн айып пул салынган.
Ага ылайык, Улуттук банктын чечими менен аты ачык аталбаган банкка 13 600 000 (он үч миллион алты жүз миң) сом өлчөмүндө айып пул салынды.
Кыргыз Республикасынын Улуттук банкы коммерциялык банктарга жана башка финансы уюмдарына мыйзамдардын же ченемдик актылардын талаптары бузулганда, анын ичинде ички көзөмөл системасы начар болсо, милдеттүү резервдик талаптар сакталбаса же кылмыш жолу менен алынган кирешелерди адалдоого каршы эрежелер бузулганда айып пул салат.
