Кыргызстан менен Катар аскер жаатында кызматташууга даяр
Депутаттар министрлер кабинети менен Катар өкмөтүнүн ортосундагы аскер жаатындагы кызматташуу жөнүндө макулдашууну ратификациялоо тууралуу» мыйзам долбоорун карашты.
Такталгандай, коргоо министринин биринчи орун басары Эрлис Тердикбаев макулдашууга ылайык аскердик тармакта бир нече багыттар боюнча кызматташуу сунушталып жатканын билдирди.
“Эл аралык келишимдин алкагында аскердик билим берүү, аскердик техникалык коргоо жана өнөр жай тармагында кызматташтык, биргелешкен машыгууларды өткөрүү.
Макулдашуу алкагында КРнын аскер кызматчыларына билим берүү курстарына, машыгууларга жана мелдешүүгө катышууга ж.б. маанилүү багыттар боюнча кызматташууга жол ачат. Ошондой эле КР куралдуу күчтөрүнүн аскердик обьектилерин курууга жана жаңылоого, Катар тараптан аскерий техникалык жардам көрсөтүү боюнча долбоорлорду аткарууга мүмкүнчүлүк берет”,- деди Коргоо министринин биринчи орун басары.
Депутат Ырысбек Атажанов бул аскерий кызматташуу жөнүндө макулдашуу Кыргызстан үчүн абдан керек экендигин белгилеп, айрым суроолоруна жооп алды.
Депутат Нуржигит Кадырбеков Катардын аскери өтө тажрыйбалуу жана күчтүү экендигин белгилеп, алардан бул багытта тажрыйбасын алуу маанилүү экендигин белгиледи.
“Кичинекей өлкө болгонуна карабастан Катардын геосаясатта орду бар. Армияны күчтөндүрүүгө багытталган тажрыйбасынан пайдаланышыбыз кажет”, - деп мыйзам долбоорун колдой турганын билдирди депутат.
