Кыргызстандагы айылдардын аттары кыргызчаланат жана адам ысымдары ыйгарылбайт – Садыр Жапаров
Кыргызстанда орусча аталыштагы айылдардын аталышы толугу менен кыргызчаланарын президент Садыр Жапаров Ош облусунун Алай районунун тургундарынын суроолоруна жооп берип жатып айтты.
"Орусча коюлуп калган айылдардын аттарын алмаштыралы деп атабыз. Муну келерки жылы жалпы республика боюнча бүтүрөбүз. Бирок ошол жерде айылдарга, айыл өкмөттөргө адамдардын аттарын коюну токтотолу деп чечим кабыл алганбыз. "Эмнеге мунун атын коёбуз? Менин деле атам кыйын болгон” деп эки жаат болуп бөлүнүп чабыша берет экенсиңер. Мындайды миңдеген жолу көрдүк”, - деди президент.
2025-жылдын башында Садыр Жапаров кол койгон мыйзамга ылайык, Аксыдагы Таштак – Малкалды, Ноокендеги Параканда – Баракелде, Кочкордогу Большевик айылы - Баялы Исакеев, Бакай-Атадагы Ынтымак – Шадыкан, Манастагы Новодонецк – Айтматов, Таластагы Козучак – Жанкороз Олуя, Балбал – Жаныбек Баатыр, Москва районундагы Чоң-Арык – Сыйдалы, Ак-Суудагы Теплоключенка – Ак-Суу айылы болуп өзгөртүлгөн.
