Кыргызстан менен Япониянын ортосундагы кош салык салуу жоюлат
Эл аралык иштер, коргоо, коопсуздук жана миграция боюнча комитетинин жыйынында “2025-жылдын 19-декабрында Токио шаарында кол коюлган Кыргызстан менен Япониянын ортосундагы киреше салыгына карата кош салык салууну жоюу жана салык төлөөдөн качуунун жана четтөөнүн алдын алуу жөнүндө макулдашууну ратификациялоо тууралуу” мыйзам долбоору биринчи окууда каралып, жактырылды. Бул тууралуу парламенттин басма сөз кызматы билдирди.
Маалыматка таянсак, Ммыйзам долбоорун Экономика жана коммерция министринин орун басары Искендер Асылкулов тааныштырды. Анын айтымында, мыйзам долбоору Кыргызстан менен бир эле учурда Япониянын салык мыйзамдарынын ортосундагы өз ара мамилелерде Кыргызстандын салык мыйзамдарындагы улуттук жоболорду чагылдыруучу бирдиктүү мамилени иштеп чыгуу үчүн зарыл.
Андан тышкары, жыйында “2024-жылдын 6-ноябрында Бишкек шаарында кол коюлган Түрк мамлекеттер уюмуна мүчө мамлекеттердин өкмөттөрүнүн ортосундагы санарип экономика чөйрөсүндөгү өнөктөштүк жөнүндө макулдашууну ратификациялоо тууралуу” мыйзам долбоору экинчи окууда каралып, колдоо тапты.
Макулдашуу электрондук сооданы, экспресс-жеткирүүнү, жеке маалыматтарды жана электрондук коммерция чөйрөсүндөгү бизнес-коомчулуктун ортосундагы кызматташтыкты коргоону камтыйт.
