"Ачык кабинет" долбоорунун алкагында бир катар жетекчилер ЖМК менен жолугат
Президенттин Администрациясынын маалыматтык саясат кызматы тарабынан ишке ашырылып жаткан "Ачык кабинет: жоопкерчилик аймагы" долбоору уланууда. Анын алкагында алдыдагы жумада аткаруу бийлигинин негизги өкүлдөрү массалык маалымат каражаттары менен ачык форматта иш күндөрүн өткөрүшөт.
18-майда Министрлер Кабинетинин төрагасынын биринчи орун басары Данияр Амангельдиев долбоордун алкагында "Биринчи радионун" түз эфирине катышып, Ынтымак Ордодо ЖМК өкүлдөрү менен пресс-завтрак өткөрөт. Ошондой эле журналисттер менен биргеликте Чүй облусуна чыгуу уюштурулуп, Президенттин Администрациясында өтө турган эки жумушчу кеңешмеге катышуу мүмкүнчүлүгү түзүлөт.
19-майда экономика жана коммерция министри Бакыт Сыдыков өзүнүн иш күнүн журналисттердин коштоосунда өткөрөт. Программада ЖМК өкүлдөрү менен бейформал жолугушуулар, кеңешмелер жана жумушчу иш-чараларга катышуу каралган.
22-майда Бишкек шаарынын мэри Айбек Жунушалиев дагы "Ачык кабинет" долбооруна катышып, борбор калаанын өнүгүүсү жана шаардагы актуалдуу маселелер боюнча жүргүзүлүп жаткан иштер тууралуу маалымат берет.
Маалыматка ылайык, долбоор мамлекеттик башкаруунун ачыктыгын жогорулатууга жана коомчулукту аткаруу бийлигинин ишмердүүлүгү тууралуу кеңири маалымдоого багытталган.
Ошондой эле ЖМК өкүлдөрү үчүн аккредитация жүргүзүлөрү белгиленип, тиешелүү байланыш номерлери жарыяланды.
