Кыргызстан менен БУУ социалдык жана экологиялык долбоорлорго басым жасайт
Министрлер Кабинетинин Төрагасынын орун басары Улан Маматканов Бириккен Улуттар Уюмунун Кыргызстандагы туруктуу координатору Антье Граве менен расмий жолугушуу өткөрдү. Бул тууралуу Өкмөттүн Басма сөз кызматынан билдиришти.
Жолугушууда тараптар Кыргызстан менен БУУнун ортосундагы учурдагы кызматташтыкты жана аны мындан ары өнүктүрүү мүмкүнчүлүктөрүн талкуулашты. Өзгөчө көңүл туруктуу өнүгүү, социалдык колдоо, билим берүү, саламаттыкты сактоо жана экология багытындагы биргелешкен долбоорлорго бурулду.
Улан Маматканов БУУнун агенттиктери өлкөдө жүргүзүлүп жаткан маанилүү реформаларды колдоодо негизги өнөктөштөрдүн бири экенин белгиледи. Ошондой эле ал уюмдун Кыргызстанды өнүктүрүүгө кошкон салымы үчүн ыраазычылык билдирди.
Өз кезегинде БУУнун туруктуу координатору Антье Граве уюм Кыргызстандагы социалдык-экономикалык туруктуулукту камсыздоого багытталган демилгелерди мындан ары да колдой турганын айтты.
Жолугушуунун соңунда тараптар кызматташууну күчөтүү, конструктивдүү диалогду улантуу жана биргелешкен программаларды натыйжалуу ишке ашыруу боюнча макулдашышты.
