Кыргызстан Өзбекстан жана Афганистан менен кызматташууну күчөтүүгө ниеттенүүдө

Министрлер Кабинетинин төрагасынын биринчи орун басары Данияр Амангельдиев "Россия – Ислам дүйнөсү: KazanForum 2026" эл аралык экономикалык форумунун алкагында бир катар эки тараптуу жолугушууларды өткөрдү.

Форумдун жүрүшүндө ал Өзбекстандын Премьер-министринин орун басары Жамшид Ходжаев менен жолугуп, эки өлкө ортосундагы кызматташтыктын актуалдуу маселелерин талкуулады.

Тараптар соода-экономикалык, инвестициялык, энергетикалык жана маданий-гуманитардык багыттагы кызматташтыкты өнүктүрүү боюнча пикир алышты. Ошондой эле мурда жетишилген макулдашуулардын аткарылышы жана биргелешкен долбоорлордун жүрүшү каралды.

Данияр Амангельдиев Кыргызстан менен Өзбекстандын мамилеси достук жана стратегиялык өнөктөштүк негизинде өнүгүп жатканын белгиледи.

“Региондор аралык кызматташтык биздин экономикалык байланыштарыбыздын негизги кыймылдаткычы болуп саналат. Макулдашуулар тиешелүү “жол карталарынын” алкагында ийгиликтүү ишке ашырылып жатат”, – деди ал.

Мындан тышкары, форум аянтчасында Данияр Амангельдиев Афганистандын жогорку билим берүү министри Неда Мохаммад Надим баштаган делегация менен дагы жолугушту.

Жолугушууда гуманитардык кызматташтык жана билим берүү тармагындагы өз ара аракеттенүү маселелери талкууланды. Афган тарап илим жана жогорку билим берүү жаатында тажрыйба алмашууга кызыкдар экенин билдирди.

Жолугушуулардын соңунда кыргыз тарап өз ара кызыкчылык жараткан бардык багыттар боюнча конструктивдүү диалогду улантууга даяр экенин белгиледи.