Кыргызстан менен Татарстан соода жана маданий байланыштарды бекемдейт

Министрлер Кабинетинин төрагасынын орун басары Улан Маматканов Татарстан Республикасынын Премьер-министринин орун басары Василь Шайхразиев менен жолугушту. Бул тууралуу Өкмөттүн маалымат кызматынан билдиришти.

Жолугушууда тараптар соода-экономикалык, инвестициялык, маданий-гуманитардык, билим берүү жана спорт тармагындагы кыргыз-татар кызматташтыгын өнүктүрүү маселелерин талкуулашты.

Улан Маматканов Кыргызстан эки тараптуу алакаларды чыңдоого жана жетишилген макулдашууларды ишке ашырууга өзгөчө маани берерин белгиледи. Анын айтымында, 2025-2027-жылдарга карата кызматташуу боюнча биргелешкен иш-аракеттер планы тараптар үчүн маанилүү жол картасы болуп саналат.

Тараптар билим берүү, жаштар саясаты, маданият жана спорт тармагындагы кызматташууга өзгөчө көңүл бурушту. Ошондой эле Кыргызстанда өтө турган VI Дүйнөлүк көчмөндөр оюндарына даярдык маселеси талкууланды.

Кыргыз тарап Татарстандын спорттук делегациясын Дүйнөлүк көчмөндөр оюндарына активдүү катышууга чакырды.

Жолугушуунун соңунда тараптар кызматташтыкты мындан ары да бекемдөөгө жана биргелешкен долбоорлорду ишке ашырууга кызыкдар экенин билдиришти.