Садыр Жапаров электрондук документ жүгүртүү боюнча мыйзамга кол койду

Президент Садыр Жапаров "Кыргыз Республикасынын айрым мыйзам актыларына өзгөртүүлөрдү киргизүү жөнүндө" мыйзамга кол койду.

Документ 2026-жылдын 30-апрелинде Жогорку Кеңеш тарабынан кабыл алынган. Мыйзамдын негизги максаты — мыйзам долбоорлорун киргизүү жана кароо тартибин өркүндөтүү, ошондой эле кагаз документ жүгүртүүнү азайтуу аркылуу мамлекеттик чыгымдарды кыскартуу.

Жаңы өзгөртүүлөргө ылайык, мыйзам долбоорлорун Жогорку Кеңешке электрондук форматта же кагаз түрүндө киргизүүгө мүмкүнчүлүк түзүлөт. Ошондой эле парламенттеги документ жүгүртүү кагаз жана электрондук форматта жүргүзүлөт.

Мындан тышкары, Жогорку Кеңеш тарабынан кабыл алынган мыйзамдардын акыркы редакциясы Президентке кол коюу жана жарыялоо үчүн электрондук же кагаз түрүндө жөнөтүлөт.

Өзгөртүүлөр "Кыргыз Республикасынын Жогорку Кеңешинин Регламенти жөнүндө" жана "Кыргыз Республикасынын ченемдик укуктук актылары жөнүндө" мыйзамдарга киргизилди.