Адылбек Касымалиев Түркмөнстандын президенти менен жолукту
Министрлер Кабинетинин төрагасы Адылбек Касымалиев Түркмөнстанга болгон жумуш сапарынын алкагында өлкө президенти Сердар Бердымухамедов менен жолугушту. Бул тууралуу Өкмөттүн Басма сөз кызматынан билдиришти.
Жолугушуу Көз карандысыз мамлекеттер шериктештигинин Өкмөт башчыларынын кеңешинин жыйынынын алкагында өттү.
Адылбек Касымалиев Түркмөнстандын президентине Садыр Жапаровдун саламын жана жакшы каалоолорун жеткирди.
Тараптар жолугушууда кыргыз-түркмөн кызматташтыгынын актуалдуу маселелерин талкуулашып, соода-экономикалык, маданий-гуманитардык байланыштарды өнүктүрүүгө, ошондой эле энергетика жана транспорт тармагындагы кызматташтыкты кеңейтүүгө өзгөчө көңүл бурушту.
