"Өкмөттүк акселераторлор": эки ири реформа ийгиликтүү ишке ашты
Министрлер Кабинетинин төрагасы Адылбек Касымалиев Президенттин Администрациясынын аппараттык жыйынында 100 күндүк "Өкмөттүк акселераторлор" программасынын алкагында ишке ашырылган эки реформанын жыйынтыгын чыгарды.
Биринчи реформа товарларды идентификациялоо жана бажы каттоосуна байланыштуу уруксат берүүчү документтерди алуу жол-жоболорун жөнөкөйлөтүүгө багытталды. Анын алкагында мамлекеттик органдардын маалыматтык системалары интеграцияланып, арыздарды кароо процесси толугу менен санариптештирилди.
Натыйжада тышкы экономикалык ишмердүүлүктүн катышуучулары документтерди бирдиктүү санариптик платформа аркылуу тапшыруу мүмкүнчүлүгүнө ээ болушту. Ошондой эле жасалма интеллект технологияларын колдонгон ai.trade.kg платформасы ишке киргизилип, товарларды талдоо жана айрым уруксат берүүчү документтер боюнча сунуштарды даярдоо автоматташтырылды.
Реформанын жыйынтыгында мамлекеттик кызматтарды көрсөтүү мөөнөтү кыйла кыскарып, документтерди кароо жана эксперттик корутундуларды берүү убактысы 14 жумушчу күндөн 3 жумушчу күнгө чейин азайды.
Экинчи реформа аскерге чакыруу курагындагы жарандардын медициналык кароодон өтүү процессин санариптештирүүгө арналды. Бул максатта "Sanarip Clinic" медициналык маалыматтык системасынын негизинде жаңы санариптик модель иштелип чыгып, пилоттук режимде Чүй облустук жалпы дарыгерлер практикалык борборунда ишке киргизилди.
Пилоттук долбоордун алкагында 788 жаран электрондук медициналык текшерүүдөн өтүп, бардык корутундулар "Түндүк" ведомстволор аралык электрондук тутуму аркылуу өткөрүлдү. Мындай ыкма медициналык кызматкерлердин жүгүн азайтып, кагаз документ жүгүртүүнү кыскартууга жана кызмат көрсөтүүлөрдүн ачык-айкындуулугун жогорулатууга мүмкүндүк берди.
Жыйындын соңунда Адылбек Касымалиев мамлекеттик органдарга санариптик жана инфраструктуралык реформаларды мындан ары да ырааттуу улантуу боюнча тиешелүү тапшырмаларды берди.
Белгилей кетсек, аталган реформалар 2026-жылдын 14-январында Министрлер Кабинетинин Төрагасы тарабынан демилгеленип, 100 күндүн ичинде ишке ашырылган.
