Кыргызстан менен Кореянын өнүктүрүү фондун түзүү демилгеси көтөрүлдү
Жогорку Кеңештин Төрагасы Марлен Маматалиев Корея Республикасынын Улуттук Ассамблеясынын вице-спикери, Корея–Кыргызстан депутаттык достук тобунун жетекчиси Пак Док Хым баштаган делегация менен жолугушту. Бул тууралуу Жогорку Кеңештин басма сөз кызматынан билдиришти.
Жолугушууда тараптар кыргыз-корей кызматташтыгын өнүктүрүү, парламенттер аралык байланыштарды чыңдоо жана соода-экономикалык алакаларды кеңейтүү маселелерин талкуулашты.
Марлен Маматалиев кийинки жылы Кыргызстан менен Корея Республикасынын ортосунда дипломатиялык мамилелердин түзүлгөнүнө 35 жыл толорун белгилеп, эки өлкөнүн кызматташтыгы акыркы жылдары бардык багыттар боюнча жигердүү өнүгүп жатканын айтты.
Ошондой эле ал экономикалык кызматташтыкты күчөтүү максатында Кыргыз–Корей өнүктүрүү фондун түзүү жана билим берүү тармагында атайын квоталарды кароо демилгесин көтөрдү.
Өз кезегинде Корея Республикасынын Улуттук Ассамблеясынын вице-спикери Пак Док Хым Кыргызстан менен бардык багыттарда кызматташууну өнүктүрүүгө кызыкдар экенин белгилеп, бул иш сапар эки өлкөнүн парламенттер аралык жана мамлекеттер аралык алакаларын жаңы деңгээлге чыгарууга өбөлгө түзөрүнө ишеним билдирди.
Жолугушууда ошондой эле билим берүү, инновациялык технологиялар жана энергетика тармактарындагы кызматташтыкты кеңейтүү маселелерине өзгөчө көңүл бурулду.
Жыйындын соңунда Марлен Маматалиев кореялык делегацияны Жогорку Кеңештин ишмердүүлүгү жана парламентти санариптештирүү боюнча жүргүзүлүп жаткан иштер менен тааныштырды.
