Мамлекеттик кызматтагы кадр саясаты боюнча аткарылган иштер талкууланды
Министрлер Кабинетине караштуу Мамлекеттик кызмат жана жергиликтүү өз алдынча башкаруу иштери боюнча агенттик 2026-жылдын биринчи жарым жылдыгында аткарылган иштердин жыйынтыгын чыгарды.
Аталган мамлекеттик агенттиктен билдиришкендей, жыйында мамлекеттик жана муниципалдык кызматты өнүктүрүү, кадр саясаты, санариптештирүү, тестирлөө, ошондой эле "Санарип аймак" жана e-Kyzmat системаларын ишке ашыруу боюнча аткарылган иштер талкууланды.
Ошондой эле жергиликтүү өз алдынча башкарууну өнүктүрүү, мамлекеттик кызматкерлерди окутуу, укуктук камсыздоо жана эл аралык кызматташтык багытындагы иштер боюнча маалымат берилди.
Катышуучулар жүргүзүлүп жаткан реформаларды, кездешкен көйгөйлөрдү жана аларды чечүү жолдорун талкуулап, 2026-жылдын экинчи жарым жылдыгына карата артыкчылыктуу милдеттерди аныкташты.
Жыйындын соңунда Мамлекеттик кызмат жана жергиликтүү өз алдынча башкаруу иштери боюнча агенттиктин директору Элчибек Жантаев мамлекеттик кызматты өнүктүрүүгө кошкон салымы жана үзүрлүү эмгеги үчүн бир катар кызматкерлерге сыйлыктарды тапшырды.
