Президенттик шайлоо 2027: шайлоочулар жана талапкерлер эмнени билиши керек?
Кыргызстанда кезектеги президенттик шайлоо 2027-жылдын 27-январында өтөт. Шайлоо Жогорку Кеңештин 2026-жылдын 24-сентябрындагы №715-VIII токтому менен дайындалган. Ушуга байланыштуу Шайлоо жана референдум өткөрүү боюнча борбордук комиссия - шайлоочуларга, талапкерлерге, саясий партияларга, жалпыга маалымдоо каражаттарына, шайлоо комиссияларынын мүчөлөрүнө жана шайлоо процессинин катышуучуларына кайрылуу жолдоду.
Анда шайлоочулар үчүн маанилүү даталар белгиленген:
· 2026-жылдын 8-ноябрына чейин — шайлоочулардын алдын ала тизмеси www.tizme.gov.kg порталына жарыяланат;
· 18-ноябрга чейин — алдын ала тизме шайлоо участкаларына илинет;
· 18-ноябрдан 2027-жылдын 12-январына чейин — тизмедеги ката же так эместиктер боюнча «Шайлоочунун кабинети» аркылуу арыз берүүгө болот.
18 жашка толгон жана мыйзамда белгиленген талаптарга жооп берген Кыргызстандын жарандары президенттик шайлоодо добуш берүүгө укуктуу. Шайлоочулардын тизмесине кирүү үчүн биометрикалык каттоодон өтүү талап кылынат.
Ал эми Президенттикке талапкерлер үчүн:
· Президенттикке талапкер 35 жаштан кем эмес, мамлекеттик тилди билген жана Кыргызстанда жалпы 15 жылдан кем эмес жашаган жаран болушу керек.
· Талапкерлерди көрсөтүү 2026-жылдын 13-ноябрына чейин жүргүзүлөт.
· Талапкерди колдоо үчүн кеминде 30 миң шайлоочунун колу керек. Ошол эле учурда берилген колдордун саны 60 миңден ашпоого тийиш.
Мындан сырткары Президенттикке талапкер шайлоо фондун түзүп, мыйзамда белгиленген тартипте 10 миң эсептик көрсөткүч өлчөмүндө шайлоо төгүмүн төлөшү керек.
Талапкерлерди каттоо 2026-жылдын 23-декабрына чейин аяктайт.
Шайлоо алдындагы үгүт иштери:
Шайлоо алдындагы үгүт талапкерлерди каттоо аяктагандан кийин башталып, 2027-жылдын 26-январында саат 08:00дө токтойт.
ЖМК жана интернет-басылмалар шайлоо алдындагы үгүт иштерине катышуу үчүн БШКдан аккредитациядан өтүшү керек. Аккредитациядан өтпөгөн ЖМКлар үгүт белгилери жок маалыматтык материалдарды жарыялай алышат.
БШК шайлоо процессинин бардык катышуучуларын мыйзам талаптарын сактоого, шайлоону ачык жана мыйзамдуу өткөрүүгө чакырды.
