Кыргызстандын Башкы прокурору КМШ өлкөлөрүнүн башкы прокурорлорунун жыйынына катышты
Кыргызстандын Башкы прокурору Малик Бектурганов Казань шаарында өткөн КМШга мүчө мамлекеттердин Башкы прокурорлорунун координациялык кеңешинин 36-жыйынына катышты. Жыйындын жүрүшүндө кылмыш жолу менен алынган активдерди чет өлкөлөрдөн аныктоо, конфискациялоо жана кайтарып алуу боюнча заманбап ыкмалар талкууланды.
Башкы прокуратуранын маалымат кызматынын билдирүүсүнө караганда, иш сапардын алкагында Малик Бектурганов Азербайжан, Казакстан, Россия, Тажикстан жана Өзбекстандын башкы прокурорлору, ошондой эле КМШ Башкы прокурорлорунун координациялык кеңешинин катчылыгынын жетекчилиги менен эки тараптуу жолугушууларды өткөрдү.
Тараптар эл аралык укуктук кызматташуу, соттолгондорду өткөрүп берүү, трансулуттук кылмыштуулукка, киберкылмыштуулукка жана баңгизаттарды мыйзамсыз жүгүртүүгө каршы күрөшүү маселелерин талкуулашты.
Жолугушуулардын жыйынтыгында - Кыргызстандын Башкы прокуратурасы менен Казакстандын жана Россиянын Башкы прокуратураларынын ортосунда кызматташтык боюнча документтерге кол коюлду. Алар практикалык өз ара аракеттенүүнү өнүктүрүүгө жана түз кесиптик байланыштарды бекемдөөгө багытталган.
Жыйындын жыйынтыгында КМШ өлкөлөрүнүн чет өлкөлөрдөн активдерди кайтарып алуу боюнча кызматташуу жөнүндө келишиминин концепциясы жактырылып, КМШ мейкиндигинде активдерди кайтарып алуу боюнча ведомстволор аралык эксперттик тармак түзүү чечими кабыл алынды.
Кыргызстандын делегациясы Казань шаарындагы ишин улантып, Шанхай кызматташтык уюмуна мүчө мамлекеттердин башкы прокурорлорунун 24-жыйынына катышат.
