Адылбек Касымалиев Минскде ЕАЭБ өкмөт башчыларынын жыйынына катышууда
Министрлер Кабинетинин Төрагасы - Адылбек Касымалиев Беларусь Республикасына болгон жумуш сапарынын алкагында Евразия өкмөттөр аралык кеңешинин тар курамдагы жыйынына катышты.
Жыйынга Беларусь Республикасынын, Казакстандын, Россиянын Өкмөтүнүн Төрагасы Михаил Мишустин, Кыргызстандын өкмөт башчылары жана Евразия экономикалык комиссиясынын Коллегиясынын төрагасы Бакытжан Сагинтаев катышты. Армениянын Премьер-министри жыйынга онлайн форматта кошулду.
Жыйындын күн тартибинде ЕАЭБ алкагындагы экономикалык интеграцияны мындан ары тереңдетүү жана ар тараптуу кызматташтыкты өнүктүрүү маселелери каралды. Бул багыттагы маселелерди кеңири талкуулоо Евразия өкмөттөр аралык кеңешинин кеңейтилген курамдагы жыйынында улантылмакчы.
Мындан сырткары иш сапардын алкагында Адылбек Касымалиев Беларусь Республикасынын Президенти Александр Лукашенко менен да жолукту. Жолугушууга ЕАЭБге мүчө мамлекеттердин жана биримдикке байкоочу өлкөлөрдүн Өкмөт башчылары да катышты.
Жолугушуунун катышуучулары Евразия өкмөттөр аралык кеңешинин отурумдарынын жана “Иннопром. Беларусь” эл аралык өнөр жай көргөзмөсүнүн жүрүшүндөгү мындай сүйлөшүүлөр жаңы практикалык чечимдерди иштеп чыгууга жана ЕАЭБ алкагындагы интеграциялык кызматташтыкты мындан ары өнүктүрүүгө өбөлгө түзөрүн белгилешти.
