Финмин I кварталда мамлекеттик карызды төлөөгө 9.3 млрд сом бөлдү
Быйылкы жылдын биринчи кварталында мамлекеттик карызды тейлөөгө 9.3 млрд сом багытталган. Бул тууралуу бүгүн “Кабар” агенттигинде өткөн маалымат жыйынында финансы министринин орун басары Улан Даникеев билдирди.
Мекеменин маалыматына караганда, тышкы карызды жабууга 6.1 млрд сом, ички карызга 2.3 млрд сом бөлүнгөн.
«Бүгүнкү күндө Кыргызстандын мамлекеттик карызы 5.6 млрд долларды түзөт, анын ичинен 80.3% — тышкы карыз – 4.5 млрд доллар, ал эми 19.7% — ички карыз — 1 млрд 104.5 млн долларды түзөт», — деди Даникеев.
Министрдин орун басары тышкы карыз быйылкы жылдын биринчи кварталында графикке ылайык толугу менен төлөнгөндүгүн баса белгиледи. Анын айтымында мамлекеттик карызды тейлөөгө каражат мамлекеттик баалуу кагаздарды сатуунун эсебинен алынат. Көрсөтүлгөн мезгилде мамлекеттик казына векселдерин жана облигацияларын чыгаруу аркылуу республикалык бюджетке 3.17 млрд сом тартылган.
«Азыр ички ресурстарды тартууга көп көңүл бурулууда. Ушул максатта март айынан баштап мамлекеттик баалуу кагаздар Кыргыз фондулук биржасына чыгарылган», — деп кошумчалады Даникеев.
Министрдин орун басары мамлекеттик баалуу кагаздар жогорку ликвиддүү элементтер болуп санала тургандыгын жана мамлекет купондук ченди жана башка нюанстарды эске алуу менен бул каражаттардын кайтарылышына кепилдик берерин баса белгиледи.
