Кыргызстан менен Сауд Арабиясы салык жана бажы тармагында кызматташууну талкуулашты
2023-жылдын 7-декабрында КРнын Сауд Араб падышалыгындагы элчиси Улукбек Марипов Зекет, салык жана бажы кызматынын башчысы Сухайл бин Мухаммад Абанми менен жолугушту. Бул тууралуу ТИМ билдирди.
Жолугушуунун жүрүшүндө тараптар КР менен Сауд Араб Падышалыгынын ортосундагы мамилелердин учурдагы абалын жана өнүгүү келечегин, ошондой эле салык жана бажы тармагында кызматташууну өнүктүрүүнүн практикалык аспектилерин талкуулашты.
Элчи эки тараптуу кызматташтыктын өнүгүүсүнүн алгылыктуу динамикасын жана эки өлкөнүн болгон потенциалын канааттануу менен белгилеп, Саудия тарапты соода-экономикалык кызматташтыкты мындан ары да бекемдөөгө жана соода жүгүртүүнүн көлөмүн көбөйтүүгө багытталган күч-аракеттерди бурууга чакырды.
Өз кезегинде С.Абанма КР менен Сауд Арабиясынын ортосундагы мамилелердин учурдагы абалын жогору баалап, өлкөлөр ортосунда Кош салык салуудан качуу жөнүндө макулдашууга кол коюлганын, бул өлкөлөр ортосундагы экономикалык байланыштарды чыңдоо жана бизнес жана инвестиция үчүн зарыл шарттарды камсыз кылуу үчүн оң кадам экенин белгиледи. Ошондой эле ал Элчинин соода-экономикалык кызматташтыкты өнүктүрүү зарылчылыгы тууралуу пикирине кошулуп, керектүү жардам көрсөтүүгө даяр экенин билдирди.
Жолугушуунун жыйынтыгында тараптар аталган макулдашууну ишке ашыруу боюнча ишти активдештирүү жана эки өлкөнүн бажы жана салык органдарынын ортосундагы өз ара аракеттенүүнү күчөтүү боюнча түздөн-түз күч-аракеттерди жасоого макулдашышты.
