Талас облусунда таштандыларды сорттоочу ишкана ачылды. Долбоорду «Альянс Алтын» компаниясы колдоду

Талас облусунун Шумкар-Уя айыл өкмөтүндө таштандыларды сорттоочу ишкана ачылды. Бул тууралуу Талас облусундагы президенттин ыйгарым укуктуу өкүлдүн аппаратынан билдиришти.

Шумкар-Уя айыл өкмөтүнүн аймагында аянты 1,5 гектарды түзгөн «Шумкар» ишканасы курулган. Жергиликтүү бийлик ишкана аймактагы экологиялык абалды жакшыртууга жардам берип, күнүнө 10-15 тонна таштандыны кайра иштетет деген ишенимде.

Айыл өкмөтүнүн башчысы Бакыт Кыдыралиевдин айтымында, ишкана жылына 12 млн сомго жакын киреше табат. Бул борборго таштандыларды андан ары сорттоо үчүн жеткирүү боюнча облустун башка ишканалары менен келишимдер түзүлөт.

 «Биз таштандыларды жеткирүү боюнча «Альянс Алтын» компаниясы менен буга чейин келишим түзгөнбүз. Биз пластмасса менен кагазды бөлүп, калдыктарды пресске салып сатабыз. 2025-жылы фильтр бар мештерди орнотууну пландап жатабыз», - деди район башчысы.

Аткаминерлер белгилегендей, долбоорду «Альянс Алтын» кен казуучу компаниясы жана «Альянс Алтын» өнүктүрүү фонду тарабынан колдоого алынууда.