Кыргызстан ислам банкингин өнүктүрүүдө Бахрейн менен кызматташат

Улуттук банктын төрагасы Мелис Тургунбаев Бахрейн Падышалыгынын Борбордук банкынын жетекчилиги менен жолугушту. Бул тууралуу Улуттук банктын маалымат кызматынан билдиришти.

Жолугушууда Кыргызстанда ислам банкингин өнүктүрүү маселеси талкууланып, Улуттук банк ченемдик-укуктук жана институционалдык базаны ырааттуу түзүп жатканын белгиледи. Кыргыз тарап Бахрейн менен кызматташтыкты бекемдөөгө даяр экенин билдирди.

Мындан тышкары, жолугушууда акча-кредит саясатынын шарият принциптерине ылайык келген инструменттерин колдонуу, рыноктун ликвиддүүлүгүн колдоо жана секторду өнүктүрүү маселелери баса белгиленди.

Жыйынтыгында тараптар эксперттик тажрыйба алмашууга жана тармактык бөлүмдөр деңгээлинде кызматташууну улантууга даяр экенин ырасташты.