ЕАӨБ: Кыргызстанда 395 миң чарчы заманбап кампа курулат
Евразия өнүктүрүү банкынын аналитиктери 23-октябрда Евразия аймагындагы өлкөлөрдөгү кампалык кыймылсыз мүлктөр тууралуу иликтөөсүн ортого алып чыкты.
Анда 2021-жылдан 2025-жылдын I кварталына чейин Евразия аймагындагы заманбап кампалардын жалпы фонду 44 миллиондон 58 млн квадрат метрге чейин өскөнү жазылган. Ошондой эле документте 2040-жылга чейин бул аймакта 20 млн квадрат метр кампа куруу пландаштырылып жатканы жана анын 1,6 млн квадрат метри Борбор Азияда жайгашары көрсөтүлгөн.
Кыргызстан жакынкы жылдарда кампалардын аянтын кеңейтүү тизмесинде Борбор Азиядагы үчүнчү мамлекет болгондуктан өлкөдө 395 миң чарчы метр кампа куруу керек болот.
“Кытай-Кыргызстан-Өзбекстан темир жолун куруу долбоорун ишке ашыруу фонунда негизги стратегия өлкөнү транзиттик хабга айлантуу жана акырындык менен эски кампаларды заманбап объектилерге алмаштырууга багытталды”,-делет ЕАӨБ билдирүүсүндө.
