Кыргызстанга "жашыл" инвестицияларды тартуу маселелери каралды

Бишкекте Кыргызстанда экологиялык таза инвестицияларды тартуу стратегиялары жана Париж келишиминин 6-беренесин колдонуу аркылуу көмүртек кредиттеринин мүмкүнчүлүктөрү талкууланган семинар болуп өттү. Бул тууралуу Айыл чарба министрлигинен билдиришти.

Иш-чарада катышуучуларга Париж келишиминин 6-беренеси жана көмүртек кредиттери боюнча практикалык колдонмо сунушталып, бул механизмдердин колдонулушу, мүмкүнчүлүктөрү тууралуу кеңири маалымат берилди.

Президент Садыр Жапаров 2021-жылы Глазгодо өткөн климат боюнча конференцияда өлкөнүн 2050-жылга чейин углероддук нейтралдуулукка жетүү жана 2030-жылга чейин парник газдарын 44%га кыскартуу максатын белгилегенин эске салды.

Уюштуруучулардын айтымында, көмүртек рыногуна толук кандуу катышуу жана эл аралык “жашыл” инвестицияларды тартуу үчүн улуттук деңгээлдеги институттар, координациялык органдар жана эл аралык ведомстволордун кызматташуусу маанилүү.