Кыргызстан өзүн өзү азыктык буудай менен 25% камсыздайт
Кыргызстан буудай менен ички рынокту 20-25%га жабарын, калган керектөө көлөмү импорттун эсебинен жабыларын Суу ресурстары, айыл чарба жана кайра иштетүү өнөр жайы министрлигинин азык-түлүк коопсуздугу бөлүм башчысы Уран Чекирбаев радиоэфирден билдирди.
Анын айтымында, советтик доордо өлкө өзүн өзү 60-80% менен камсыз кылып келген болсо, азыр буудай импорту 80%га жеткен. “Азыр дан эгиндеринин башка айыл чарба өсүмдүктөрүнө салыштырмалуу кирешеси аз. Биз фермерлерди колдоого аракет кылып жатабыз. Бирок бизде мал жана канатуулар чарбачылыгы жакшы өнүккөндүктөн көпчүлүк буудай эгилген талаалар азыр тоют өсүмдүктөрү – арпа, беде айдоо үчүн колдонулуп жатат”,-дейт ал.
Буга улай ал Кыргызстан буудайы клейковинасы жана катуулугу боюнча Казакстан, Россияныкына жетпей турганын айтат. “Сатып алуучулар так ушуга маани беришет. Ошондуктан үрөнчүлүктү өнүктүрүп, азыктык буудайды сатып алуу механизмдерин жакшыртышыбыз керек”, дейт ал.
